Amerikanskt herskip vitjar í Runavík

Í morgun kom amerikanski oyðarin USS Ross (DDG-71) inn á Runavíkar havn. Herskipið, sum verður liggjandi við bryggju til sunnudagin, er komið inn á Runavíkar havn fyri at bunkra olju, sleppa av við burturkast, fáa vatn og reservalutir umborð og aðrar líknandi tænastur.

USS Ross er av slagnum Arleigh Burke, og er heimahoyrandi á amerikansku flotastøðini í Rota í Spania. Skipið er 154 metrar langt, maskinorkan er 100.000 og manningin telur umleið 300.