Spennandi dagar á Seatrade

Seinastu vikuna hevur Runavíkar havn luttikið á altjóða ferðaskipastevnuni Seatrade Cruise Global í Miami. Dagarnir hava verið sera spennandi við nógvum fundum við reiðarí, sum vit hava samstarvað við í fleiri ár og onnur reiðarí, ið vit síggja fram til at samstarva meira við.

Reiðaríini vísa stóran áhuga fyri okkara fýra ferðamálum, millum annað tí at afturmeldingarnar frá gestunum umborð á skipum, ið longu hava vitjað, eru sera góðar. Okkara ferðamál eru Kongshavn á Skálafirði, har øll sløg av skipum kunnu leggja at, og bygdirnar Elduvík, Funningur og Oyndarfjørður, har tikið verður ímóti trimum ekspeditiónsskipum um árið. Oyndarfjørður er nýtt ferðamál, sum vit hava bjóðað fram seinastu tvey árini, og fyrstu skipini koma til bygdina næsta ár. Eins og í Elduvík og Funningi verða ferðafólkini førd í land við smábátum.

Bíleggingarnar komandi árini nærkast teimum 70 skipunum. Eitt dagført yvirlit yvir komandi vitjanir sæst á heimasíðuni hjá Runavíkar havn: https://portofrunavik.com/cruise-calls

Úr Føroyum luttóku Runavíkar havn, Tórshavnar havn, Klaksvíkar havn, Vágs havn, Faroe Ship, Tor Shipping og MB Tours.